英國利蘭汽車公司（British Leyland Motor Corporation）係英國一間汽車製造公司，旗下有近100個牌子，1968年組成。
英國利蘭汽車公司經歷過好多麻煩嘢，曾經瀕臨破產、被國有化，之後被分成多個部分賣畀其他公司。最後佢嘅後繼者MG路華集團喺2005年倒閉，標誌住英國人擁有嘅大量生產汽車業玩完[未記出處或冇根據]。
. . . 英國利蘭 . . .
英國利蘭汽車公司係喺1968年英國工黨政府支持之下，由利蘭同埋英國汽車控股合併而成[1][2]。嗰時英國汽車控股就嚟冧而利蘭就做得掂，當時工黨政府希望利蘭嘅專長可以帶起英國汽車控股。呢次合併將接近100間公司帶入同一間公司，佢哋包括英國大部分房車、巴士及貨車製造廠，另外重有第二啲廠好似冷藏設備製造廠。主席Donald Stokes爵士（前利蘭主席）將公司分成七個部分。
喺合併之前，英國汽車控股旗下公司之間已經有一定嘅內部競爭，合併之後再加埋原利蘭旗下嘅公司，令內部競爭加劇，而旗下亦有好多類似嘅產品。英國利蘭汽車公司曾經好努力將自己塑造成一個牌子，做過好多宣傳，但反而令啲客覺得好混亂。再加上勞資關係差、1973年爆發石油危機、每月禮拜開三日工、高通脹同埋缺乏有效管理，令英國利蘭汽車公司變得難以管理，而財政又唔掂。即使喺1974年得到政府注資，英國利蘭汽車公司去到1975年已經面臨破產。
由Don Ryder爵士針對英國利蘭汽車公司問題而寫嘅Ryder Report喺1975年3月26號呈交畀政府。之後根據報告提議，工黨政府成立新控股公司英國利蘭（British Leyland Limited）去接收英國利蘭汽車公司，並將公司大幅重組。重組後嘅英國利蘭分成四個部分[3]：
- Leyland Cars（後改叫BL Cars）：英國最大房車製造廠，每年最多出到一百萬架車。
- Leyland Truck and Bus：英國最大商用車及載客車輛製造廠，每年出38,000架貨車、8,000架巴士（包括一間同National Bus Company合資嘅公司）同埋19,000架拖拉機。
- Leyland Special Products：包含其他收購得嚟嘅業務。下面再細分為五部分：
- 建築設備生產：Aveling-Barford、Aveling-Marshall、Barfords of Belton同埋Goodwin-Barsby
- 冷藏設備生產：Prestcold
- 貨物搬運設備生產：Coventry Climax（包含Climax Trucks、Climax Conveyancer同埋Climax Shawloader）
- 軍車生產：Alvis同埋Self-Changing Gears
- 印刷：Nuffield Press同埋Lyne & Son
- Leyland International：負責汽車出口同埋管理喺非洲、印度同埋澳洲嘅廠。
1977年，Michael Edwardes成為英國利蘭嘅行政總裁[4]。同年Leyland Cars分拆成Austin Morris（出大量生產嘅房車）同埋Jaguar Rover Triumph（JRT，出較專門嘅車以及高檔車）。Austin Morris包埋MG。越野路華（Land Rover）同埋Range Rover後來脫離JRT並組成越野路華集團（Land Rover Group）。JRT其後再分拆成Rover-Triumph同埋Jaguar Car Holdings（包括積架同埋丹拿）。
1978年英國利蘭成立新嘅BL Commercial Vehicles去容納佢嘅商用車業務，BL Commercial Vehicles包含：
- Leyland Vehicles Limited（貨車、拖拉機同埋巴士）
- Alvis Limited（軍車）
- Coventry Climax Limited（鏟車同埋特種引擎）
- Self-Changing Gears Limited（重型波箱）
後來BL Commercial Vehicles同埋Land Rover Group合併為Land Rover Leyland。
1979年英國利蘭改名BL，佢旗下包含集團內其他公司嘅控股公司The British Leyland Motor Corporation就改叫BLMC。
去到1982年，除咗Jaguar Car Holdings之外，其餘嘅房車生產業務都被列入Austin Rover Group。
. . . 英國利蘭 . . .
